واحذر سرور بغبة البحر يرميك = ولا هو مفكر في تجزعك وبكاك


واعرف ترى اللي وطا الفعر واطيك= ولا انت اعز من الجماعة هذولاك

الحارثي رد المثايل قراحي = سواة عدٍ من مخاييل الاقراح


للصاحب اللي سند الدرب ضاحي = وروح ولكن ضميري فلا ارتاح


لن ضاقت الديرة وشح المراحي = تلقى رفيقٍ باسط الوجه والراح


وياليت وادينا بأرضٍ براحي = يكفى جميع اللي نبيهم ونرتاح


يا ما حلا الفنجال بأرضٍ بياحي= ريح العويدي ذاخره عقب ما فاح


في ظل سرحه والركايب ضواحي= والبال من كثر الهواجيس منساح


الفي مال وصوتوا بالفلاحي = وشالوا على هجنٍ عليها الحلق لاح


وتنحروا شيخٍ قليل المشاحي = اللي على ضين المربين ذباح

وانته يا ابو مالك كسبت الرباحي= بردان تسقي وراعي الزرع مرتاح


لك وجبةٍ تلبسك زين الوشاحي = تكرم رفيقك والخطاطير سياح


وتنضب تصب لو كان ماها شحاحي = اشوى من اللي يرقب السيل نطاح


مرة يسيل ومرة ما يلاحي= لكن ربك قد تكفل بالارواح

يالله ياللـي كـل الأمـات ترجيـك=يا واحدٍ مـا خـاب حـيٍ ترجـاك


يا مرقبٍ بالصبـح ظلّيـت اباديـك=مـا واحـدٍ قبلـي خبرتـه تعـلاك


وليت يا ذا الدهر ما اكثـر بلاويـك=لله يزودنـا السلامـة مـن أتـلاك


ياللي على العربان عمت شكاويك=وليت يا دهـر الخطـا ول مقـواك


واليـوم هالكانـون غـادٍ شبابيـك=تلعب به الأرياح مـن كـل شبـاك


يا مالك اسمع جابتي يوم أوصيـك=واعرف ترى يا بوك بامرك وانهـاك


وصيـةٍ مـن والـدٍ طامـعٍ فيـك=تسبق على الساقه لسانـه لعليـاك


أوصيك بالتقوى عسـى الله يهديـك=لهـا وتدركهـا بتوفيـق مــولاك


الله بحـق أجـدادك الغـر يعطيك=رضاه مع كل ما تمنى مـن امنـاك


احفظ دبشك اللي عن الناس مغنيـك=اللي إلى بان الخلـل فيـك يرفـاك


واعرف ترى مكة ولاها ابن اخيـك=لو تطلبه خمسة دواويـن معطـاك


اجعل دروب المرجلة مـن معاليـك=وادراج سيّسها على العـز مرقـاك


لا تنسدح عنها وتبغينـي أعطيـك=جميع ما يكفيـك مـا حاصـل ذاك


احذر امـر ليعـات أبيهـا لتاليـك=ايضا ويرخص عندها قـدر مـأواك


أدّب ولدك إن كان تبغيـه يشفيـك=واستسعفه من بعـد مربـاه بـالآك


أما سمج واستسمجك عنـد شانيـك=ويفر من فعله صديقـك وشـرواك


وإلاّ بعد جهله تـرى هـو بياذيـك=لو زعلـت أمـه لا تخليـه يـالاك


واحذر تضيع كل من هو ذخر فيـك=معروفه لا تنساه واوفـه العرفـاك


ترى الصنايع بين الاجواد تشريـك=إلـى طمعـت بركزهـا لا تـعـداك


واحذر سرور بغبة البحـر يرميـك=ولا عنده افلس من تجزعك وابكـاك


واوف الرجال حقوقها قبـل تاتيـك=لا تعتمـد بالعفـو فالحـق يقفـاك


وهرج النميمة و القفا لا يجي فيـك=واياك وعرض الغافل ايـاي وايـاك


تبدي حديث للنـاس فيـه تشكيـك=وتهيم عند الناس بالكذب واشـراك


واذا نويـت احـذر تعلـم بطاريـك=كم واحد تبغي به العـرف واغـواك


واحذر شماتة صاحب لك مصافيـك=والى جرا لك جـاريٍ قـال لـولاك


ولا تحسب إن الله قطـوعٍ يخليـك=ولا تفرح إن الله على الخلق بـداك


إن اشتهى حط الطمع فـي تواليـك=لو ما لقيته يا فتـى الجـود يلقـاك


والضيف قـوم لـه حيـن يلفيـك=مما تنوشه يا فتـى الجـود يمنـاك


اكرم قبالـه فانهـا مـن شواديـك=وابذل له المجهـود مـا دام يعنـاك


واحذر تلاقي الضيف مقرن علابيـك=خله محـب لـك صديـق إذا جـاك


وأوصيك زلات الصديق إن عثا فيك=ما زال يغطاها الشعر فاحتمـل ذاك


راعه ولو ما شفـت انـه يراعيـك=عساك تكسر نيّتـه عـن معـاداك


واحذر عدوك لو بقا بـي يصافيـك=عود الجنا واطعنـه حينمـا جـاك


لا تامنه فاطلـب مـن الله ينجيـك=ويكفيـك ربـك شـر ذولا وذولاك


شفني أنا يابـوك بآمـرك وانهيـك=عن التعرض بين الاثنيـن حـذراك


وإذا حضرت طلايبٍ مـع شرابيـك=اسع لهم بالصلح والـلاش يفـداك


ابذل لهـم بالطيـب ربـك ينجيـك=لا تجضع الميـزان مـع ذا ولا ذاك


أما الشهادة أدّهـا إن دعـوا فيـك=بيّن عمود الدين لا عميـت اريـاك


بالك تماشـي واحـد لـك يرديـك=طالع بني جنسـك وفكـر بممشـاك


رابع أصيل فـي زمانـك يشاكيـك=وإلى شاف خملاتك عن الناس غطاك


واحذر عن طرد المقفـي حذاريـك=عليك بالمقبـل وخـل مـن تعـداك


ثم العـن الشيطـان ليـاه يغويـك=تـرى إن تبعتـه للشّرابيـك وداك


واوصيك لا تشكي علينـا بلاويـك=أنت السبب اخذك عيونـك بيمنـاك


واعرف ترى اللي وطا الفعر واطيك=ولا أنت أعز من الجماعة هـذولاك


المسك يا راسي عن الذل واخطيـك=واحذر تكلـم يـا لسانـي حـذاراك


والطف بجارك ثم قـم دون عانيـك=وافطن إلْما يعنيك عن ربعة أخـواك


يا ذيب وان جتك الغنم في مفاليـك=فاكمن إلى حيـث الرعايـا اتّعـداك


من أولٍ يا ذيـب تفـرس بياديـك=واليوم جا ذيبٍ عن الفـرس عـداك


يا ذيب عاهدني وأعاهدك ما رميـك=مرميك أنا يا ذيب لـو زان مرمـاك


والنفس خالف رايها قبـل ترميـك=ترى لها الشيطان يرمـي بـالادراك


ومن بعد ذا لا تصحب النذل يعديـك=وعن صحبة الأنذال حاشاك حاشـاك


ترى العشير النذل يخلـف طواريـك=وأنا أرجي إنك ما تجي دون آبـاك


والهقوة انك ما تجـي دون أهاليـك=ولا ذكر عود الورد يثمـر بتنبـاك


والحر مثلك يستحي يصحب الديـك=وان صاحبه عاعا معاعات الاديـاك


لا تستمع قول الطرف يـوم يلفيـك=بالكذب يقضي حاجته كل مـا جـاك


من نم لك نم بك ولا فيـه تشكيـك=والاَّه قــد أزرا رفـيـقـك وأزراك


عندك حكا فينا وعندي حكـا فيـك=وأصبحت كارهنـا وحنـا كرهنـاك


ما اخطاك ما اصابك ولو كان راميك=واللي يصيبك لو تتقيت ما اخطـاك


مير استمع مني عسـى الله يهديـك=النصح يـا مالـك لـك الله مـولاك


عنـدي مظنـة مـا تمثلتهـا فيـك=واطلب لك التوفيق من عند مـولاك