• ×

آل لؤي , الشريف غالب بن منصور بن غالب، أبو لؤي العبدلي، الشاعر

زيادة حجم الخط مسح إنقاص حجم الخط
آل لؤي
الشريف غالب بن منصور بن غالب، أبو لؤي العبدلي، الشاعر
1356 1425هـ

الشريف غالب بن منصور بن غالب بن ناصر بن عبد الله بن حسين بن لؤي العبدلي ولد رحمه الله عام 1356ه في الخرمه وكتب الشعر وهو في سن الثامنه عشر من عمره، كتب في اغراض الشعر المتعدده من المدح والرثاء والغزل والوصف توفي رحمه الله في محافظة الخرمه في رمضان 991425ه رحمه الله ابو لؤي رحمة واسعه واسكنه الله فسيح جناته.
محاورة بين البدوي والفلاح للشاعر الشريف غالب بن منصور بن لؤي:


بأبدي بذكر الله على مايكــــــــــــــوني=قدام بدع امثالها واللــــــــــــــــــحوني
وأعدل القيفان عدل الغصـــــــــــــــوني=من هاجس عنا هنـــــــــــاديب الافكار
وأصب قافي مثل صب الريـــــــــــــالي=وألعب بملحوني على شــــــــف بالي
حيث المعاني تستوي للرجالــــــــــي=وأتشوق اهل العرف واصحـــاب الانظار
وترى القصيد أمجيد يا مســــــتمع فيه=لا جا من اللي باخص في معانيــــــــه
ويعدل القيفان ما هوب يلــــــــــــــــويه=معتاد في بدع الملاحين بـــــــــــــيطار
واللعب لا مني بغيته يجـــــــــــــــيني=خذت الدفاتر والقلم في يــــــــــــديني
وأسعره من باب سعر مكيـــــــــــــني=وآخذ من الجزلات والزين واخــــــــــــتار
وجاني اثنين من الرجال المـــــــفاليح=واحد خصيم عن جميع الفلالــــــــــــيح
والآخر اللي وكلوه المصالـــــــــــــــيح=أهل البكار اللي رعت عشــــب الاقفار
قالوا ترانا يوم جيناك راضــــــــــــــــين=أحكم بحكم يقصر مناحس الشــــــــين
قلت أدعوا والحق ما يرضي اثنـــيــــن=لو كان انا في حكمكم صرت محـــــــتار
قلت ان كان راعي البل بدا بالخصومه =اركد ترانا في دواير حــــــــــــــــــــكومه
لا تحسب انك يم هضبة يعـــــــــــومه=تجر صوتك عند اباعرك فــــــــــــــي غار
قال ابغاك تحكم لي وتحكم علـــــــيه=واتشوف منا اللي جزع بالخـــــــــــطيه
وعودت تلمزني بذكر المطــــــــــــــيه=احسبك قاضي واثرك الـــــــــــيوم عيار
قلت اقول لك بشويش لا ترفع الصوت=وحط العصا والخنجر اللي ورا الـــــكوت
وذولا المشايخ هايبين من المــــــوت=والبدو هم اللي مقابيس الاشــــــــــرار
احتج عندي بالكلام المـــــــــــــقادي=وكب اللجايج والخطا والعـــــــــــــــنادي
ولازم تثبت حجتك بالـــــــــــــــوكادي=هات الصحيح وكب تلفيــــــــــق الاعذار
ثم قال راعي البل لنا حق وحــــقوق=حنا هل الطالات وانا هل النـــــــــــــوق
اللي تبعدنا عن المشي في السوق=ولاعندنا لوكان غلين الاســــــــــــــــعار
الزاد فيها والكلا والحـــــــــــــــــليبي=اليا لقت مع الشقارا رطيبـــــــــــــــــي
والا انت تاكل لك تميس وزبيــــــــبي=حتى عشاك يخاشرك فيه عـــــــــــمار
ثم قال له راعي النخل والفلاحـــــــه=الشكر لله وسط غرس وراحــــــــــــــــه
ماني بمثلك يا قليل الربــــــــــــــاحه=انا مريح وانت من دار فـــــــــــــــــي دار
لا جا الربيع وحلت بالذود للعشـــــب=اما ورا الصمان والا ورا كــــــــــــــــشب
للعبد يزري يظهر العذق لا نشـــــــب=اصرم واسعر وانت في زود محـــــــــدار
واهل الفلاحه في النخل مستريحين=بين المكاين والعنب والبـــــــــــــساتين
والبدو عذبهم ركوب البــــــــــــــعارين=وشديدهم في الليل والصـــبح ما انطار
عشرين شده في الضحا كل يومـــي=تقفي وتقبل والمظاهير تومـــــــــــــــي
والقيظ جاكم والضما والســــــمومي=مالك ومال اللي يوديك الاخــــــــــــــطار
ازين تريح عن جميع البـــــــــــــــداوه=وعن النشايب والعنا والشــــــــــــــقاوه
وان كان تبغى راحتك والطــــــــــراوه=انزل مع اللي نازلين بجبــــــــــــــــــــــار
مع الرجال اهل الغروس الظلـــــــيله=قبيلة وا ويها من قبـــــــــــــــــــــــــــيله
فكاكة المرثي نهار الدبيــــــــــــــــله=لا جا لزلبات الرمك فيه معــــــــــــــــصار
ثم قال راعي البل ما ابيلك تدابيـــــر=عيب على اللي يبدي الشور ما شـــــير
شفي قطيع فيه رمس المغاتــــــــير=حتيش يا غرسك ولو كان ثمــــــــــــــــار
حتيش لو يثمر وتكبر عـــــــــــــذوقه=وحصيله اللي ينتجه ما يسوقـــــــــــــــه
لا جاك راعي الدين يبغى حقـــــوقه=قام يتردد ما خلص قطعة امـــــــــــــــــرار
والا ترى البل في ليال الربيــــــــعي=نشرب لبنها وان بغينا نبيــــــــــــــــــعي
خذنا الدراهم في يدينا جميـــــــعي=محتاج يالفلاح والبدو تجـــــــــــــــــــــــار
ثم قال له راعي النخل لو تمــــــاري=مغبون لو عسيت نقع الخبـــــــــــــــاري
لا احداك عن ام السرب والمــــقاري=لا جيت تبغا لك حشيه ومـــــــــــــصفار
هدب الجريد اللي قبل ما يروحـــــي=كبار الشباب اللي يزيد الفروحــــــــــي
لو كان عندك خلفتين ومســــــوحي=لو بعت ما جن للمكينه بمســـــــــــمار
يالبدو عذبكم شراب المــــــــــلاحي=وانا نزلت بغرستي في القراحـــــــــــي
والليا رقاها عبدها بللـــــــــــــقاحي=ثم نشرت يازين ذاك التنشــــــــــــــــــار
ولا جا يعدلها لقاها على الكـــــــيف=وسع تخاريص الجريد المــــــــــــــهاديف
يا زينها لا نظفوها عن اللـــــــــــــيف=مثل الهنوف اللي تهنــــــــــــصر تهنصار
وغرسي رواسي ما يصيبه جفـــالي=ماهوب يعقل بالمرس والحــــــــــــبالي
يا زين نومي في طويل الظــــــــلالي=في وسط دالوب حوابيطه اكبـــــــــــــار
والا انت ما تعرف تدبر حـــــــــــــلالك=في الليل ذودك عازب عن عــــــــــيالك
تمشي مع الخليان دايم لحــــــــالك=وان مت ما تلقا مغسل وقبــــــــــــــــار
لا جا العصير وجت حلول المــــراويح=والناس قامت تذكر الله بتســــــــــــبيح
لينك تعدي في المراقيـــــب وتصيح=ما كنك الا من المجانين بشـــــــــــــهار
ثم قال راعي البل تسمع جوابـــــي=لا قل ماك ويبسن الجوابــــــــــــــــــــي
ووصل مجم البير حزم صلابــــــــــي=قالوا تولم هات للبير حــــــــــــــــــــــفار
ضلع نكاز ماه ماعاد ينــــــــــــــــاش=وحولت بالمقلاع تبغاه ينـــــــــــــــــهاش
ويوم الصبي شافه قوي فض وانحاش=وامسيت في هم النخل جعـــلك مجار
ياما جرا لاهل النخل والكـــــــــداده =امن التعايس والمحن والزهـــــــــــــــاده
تلهيك حتى عن فروض العبـــــــاده=عن الصلاه وعن مقامك بالاســــــــــــحار
والا ترى البل مستمر ســــــــعدها=كم خلفة ما اصـــــــــــــــــرها عن ولدها
واليا ضوت على العرب في وعــدها=غبقتهم لو يمتلي الـــــــــــــــبيت خطار
يا ما حلا لا روحت عقب مــــــسراح=على فريقي والمطر تو ما طـــــــــــــــاح
ما غير ندفعها عن العشب ســـماح=كن الجمل في وسطها يظرب الـــــــطار
ثم قال له راعي النخل والزروعــــي=ما أسمع كلامك في كبار الفــــــــروعي
في غرسي اللي في المسيله شروعي=يا غردق وأكثر طلاعه تبـــــــــــــكار
ما أطيع في سب الجبابيــر ما اطيع=اليا طلع مثل البني المفاريـــــــــــــــــــع
وكله تبكر بالعذوق المهانيـــــــــــــع=وكانه بعد غير العنب حطوا اشــــــــــجار
الغرس كل اهل المراجل تحبــــــــه=قدامنا ابن جويريه ما يــــــــــــــــــــــسبه
واليا طمع به واحد ما يســـــــــــــبه=ما مثل الغرس في كل الاقــــــــــــــــطار
لا جت ليال القيض والبدو مبطــــين=كبو جميع ادباشهم والمقاطيــــــــــــــــن
على العدود ومقعد في المعاطيـــن=لو كان ذودك كل حيرانه ابـــــــــــــــــــكار
كبوك لا قالوا ترى اللون قد شيــــف=يبغون مقياظ النخل والمخــــــــــــــــاريف
وأكل الرطب امن العذوق المراديــف=وياراعي النوقات ما عاد لك كــــــــــــــــار
ثم قال راعي البل عسى الله يعيني=ومن راح عني لازم انه يجــــــــــــــــيني
والله ما اكب مجروعات الحنـــــــيني=واني لاصدر عـــــــــــــــــــــندها بام كرار
واليا وردت مطلوحات العــــــــــدودي=امن الشفا والا من اقصى النـــــــــفودي
دليت لي دلو سناه القعــــــــــــودي=لعرب عليها نيها كنه اجــــــــــــــــــــــدار
ولا صدرت من عدها مســـــــــــتمره=تبغا مكان في شواويه غـــــــــــــــــــــره
يا زين حذف اديودها للاصـــــــــــــــره=في مرقم جا للزهر فيه نـــــــــــــــــــوار
ورعي النخل خطر من الهم والــــويل=لا قالوا الوايت تعطل ورا الســـــــــــــيل
ثم قلت شوفوا وش بعد فالبـــــراميل=قالوا لنا يومين ناخذ من الجــــــــــــــــار
ثم اهجرت كل المكاين وقوفــــــــــي=وسط البيار ملحفات صــــــــــــــــــفوفي
وغرسك تعرض للخطر والصــــــدوفي=ولا خير في شئ طعامه فالامـــــــــصار
وان جيت تبغا لك معاويد عــــــــــييت=حتاك تدري عن خطاك انك اخـــــــطيت
البل تعينك كلما طحت وازريـــــــــــت=على النخل تعين وافين الاشــــــــــــبار
البل لها عند النشاما محــــــــــــــــبه=ما أخبلك ياللي تلحق البل مســــــــبه
أخير من بير تبي منك صـــــــــــــــــبه=عاقبك ربي بالنخل والتخــــــــــــــــسار
يا حبني لمقرقعات التــــــــــــــــوادي=اللي تبعد عن وخام البــــــــــــــــــلادي
ما أزين جملها في ليالي الهـــــدادي=ما ينردع عن جلها كود بهـــــــــــــــــجار
ثم قال راعي الغرس علم بتـــــــوكيد=ياراعي البل ما نبيلك معــــــــــــــــــاويد
بآخذ مكينه من الزراعه بتقصـــــــــيد=واسوق بستاني ولو صار ماصــــــــــار
وايضا حكومتنا لنا مستـــــــــــــــعده=جت بالمكاين عانها وسط جـــــــــــــــده
والبنك فاتح فيه من كل عـــــــــــــده=وفي عهد فيصل للفلاحة تطـــــــــــــــــوار
بأقوم في غرسي ولاني بمليــــــــوم=والله لاجاهد عنده الصبح واليـــــــــــــوم
واقومه بعزوم واطيح واقـــــــــــــــــوم=لو كان صرت من التعب فيـــــــــــه
جضار المرجله ما حد خذاها بهــــــــــــوني=ولا أحد كسبها بالهوى والخـــــــــــموني
كود الرجال اللي قبل يتعـــــــــــبوني=وغمر على صكات الايام صــــــــــــــــــبار
ياراعي البل ظن قلبك هـــــــــــبيلي=لوكان تملا من لبنها الصميــــــــــــــــلي
والغرس ماله في المراجل مثيـــــلي=ربي جعل في الغرس جنات وانـــــــــهار
ويوم ان مريم جت بعيسى تشيـــــله=جعل لها ربي نخلة ظلــــــــــــــــــــــيله
تسقط عليها من رطبها هليــــــــــــله=وهذا دليل الغـــــــــــــرس له زود مقدار
قلت اسمعوا يأهل الظفر والحـــــميه=الكل منكم ما بقا له دعيــــــــــــــــــــــه
يا حبني لأهل الوجيه الرضــــــــــــيه=اللي يطيعون النصيحه والاشــــــــــــــوار
وانا بأواسى بينكم يالعــــــــــــــواني=عندي حشام وكلبوكم خوانـــــــــــــــــي
والصلح خير وسيد كل المــــــــعاني=واللي يعيي ما يبي الصــــــــــــــــلح بوار
ياراعي البل ما لقينا لك امثــــــــــال=ام الجمايل هي في كل الاحــــــــــــــوال
وهيه طرات الوقت والعز والــــــــمال=اليا رزقها الله من الوسم بامطـــــــــــــــار
واما انت ياراعي النخل والزراعـــــــــه=لا جت ليالي القيض عندك طمــــــــــاعه
مخارف تكتها كل ســـــــــــــــــــاعه=لاهل الركاب اللي من البعد ظـــــــــــمار
وصلاة ربي عد ماناحــــــــــت الورق=فاقصى الشمال ويمت الشام والشـــرق
وعد الرعود وما اختــــفق لايح البرق=على نبي عزه الله عن النـــــــــــــــــــــار
وعدود ما جرت لحنها الحــــــــــمامه=على شفيع الناس يوم القيـــــــــــــــامه
يوم ان كل ما يبي الا الســــــــــلامه=في موقف نهار شخصات الابصـــــــــــــار

ومن قصائده في المدح :

اجاد غالب في قصائد المدح بشكل رهيب
يقول غالب في قصيده قالها في الملك عبدالله :


ابو عين ٍ لها سطوه وابو يمنا\" لها مضراب =مغير عيون ابوه ووجهه وخشمه وحجانه .!
وقصائده في المدح كثيره جدا\" لا احفظها


و قد برع ايضا\" في مجلات عده منها القصائد الاجتماعيه والدعويه والغزليه

يقول في قصيده له :


حن قلبي حن مورٍ مع السيل الكبير =با هتينه مع بهيته وحمله ضـاهده
حمله من جده العصر في الليل القصير= واصبح الصبح الدريول مغير يجاهده
الحراره قايمه والحمل حملة شعـير= وماخذٍ عربون راع الدبش ومواعده
كن حس المور لا شغله فأقصى الضمير =مع ملفات قبل يكسرن مــساعده
والبلا يوم النخل بايح ٍ ماه الغزيـــر= ماخذٍ له مدة ٍ ما مشى مع قايـده
الجريد مهشم ٍ والسبر عيا يسيـــر = وان حفرنا في الجبل ما لقينا فايده
والكرى بعض الليالي عن المحجر يطير=من هواجيس تجي والخلايق راقده
يوم خطو الهربدي راقد ٍ فوق السرير= ويتسدح في الفيايا على وسايـده
لا له بلاد ٍ تبا تشغله ولا له بعــير= والمراجل كل ما جا يبيها كايـده
جالس بين الربايع يعاين في العشير= بارد ٍ وجهه مع اهل الوجيه البارده
جعل عذرا\" ما تنكد معه والا تنيـر= جلعها بالضغط فالدم والا الزايـده
نعنبوها وش تبا بالمهبل والدشيـر!= كيف تجلس عند خبل العرب وتعاهده ؟!
قصائده في النخل كثيره جدا\" جدا\" وذلك ان دل فإنما يدل على حبه للنخل وتعلقه به
والا كيف يقول :


من حب غالب للنخل حط له قطـّار != عقب هدة الما والحوابيط ممـليه
وجودي على بير ٍ قبل فقرها فـوّار= واركب عليها لي مكينه وسطحيه
على شان اشغّل واسّـي الغرس فالمبدار= واردد عزير الماء على كل صفريه

اضافة لتعلقه بالنخل كان ايضا\" شديد التعلق بالبر وبالإبل وبحياة الباديه
فهو يقول في ابيات له :

ت

رى سجة في البر مع ربعي الغالين = تبعد هموم ٍ تالي الليل تشعاني
على خطو جمس ضامر ٍ مقدم الشاصين= جديد من الممتاز ماهوب ياباني
بشم الهوى ما دمت حي مع الحيين = عن المقعد اللي فيه نقص ٍ وحقراني
ليا شفت ( حسـّن) و(الغراميل) مع (رمحين) = تجدد حياة ٍ تنعش فؤاد الانسـاني
مداهيل ابويه يوم ذاك الزمان الزين= قبل تنقلب بقعا على وجهها الثاني !


ومن المواقف التي مرت على غالب منصور انه كان لا يشرب القهوه في الثلاجه - زمزميه القهوه -
وهذا معروف عنه وعندما سمع احدهم بذلك قال : بعزم غالب وبجيب له القهوه في الثلاجه
وفعلا\" عزم الرجل غالب ولبى طلبه وعندما حضر غالب الى هذا الرجال قدم له القهوه في ثلاجه
فردها غالب ولم يشرب منها الى ان قام الرجل واتى بالدله فشرب غالب منها
وعندما انتهى من هذه العزميه قال :


انا بنصح اللي يشري البن يبغى الكيف = يحطه بدلـّـه لا يحــطه بثلاجه
نصيحه تجنّب هرجة اهل الكبود العيف = عزاز النفوس وفالمحاضير هراجه
مدامه يطع الحرمه تصرفه تصريـف= يكب الكرم والناس ما همب في حاجه
ومن المواقف ايضا\" ان احدهم اتى الى بيت غالب وقت الضحى واخذ يطرق الباب بشدّه
فقال غالب على البديهه :


ياللي تطق الباب لا تكسر الباب = الباب مفتوح قبل تطلع الشمس
اقلط على ضو ٍ تولع بمشهاب= مهوب قز ٍ بايح ٍ غازه من امس
والابيات اطول من ذلك



اما في الغزل فحدّث ولا حرج
فهو البحر الغزير الذي لا يقاس مداه ولا يرى منتهاه

يقول غالب :


ويالجتي لجة خلوج ٍ تجر الصوت = تحطـّـم تبا المحدار فالشبك مقهوره
قهرها المزارع فالنخل لين جاها الموت= عن الديره اللي فأول الوسم ممطـوره
ويا حن قلبي حن مورٍ مع المنحوت= طلع بالحموله وانكسر فيه ماصـوره
تزيد الحراره لين يرفع له الكبوووت= من الجور صارت طبلة الراس مسعوره
على الصاحب اللي صار بيني وبينه فوت= دياره بعيد وحسبي الله على نـــوره!

قد كان رحمه الله يطعم قصائده دائما\" ببعض من الفكاهه وذلك انعكاسا\" من روحه المرحه ونفسه الطيبه :

يقول:
في قصيدة مرسله الى خاله الشاعر / الفديع بن فيحان


يانديبي قم ترحـّـل على هاف ٍ سريع = عاصب ٍ كنه جمل شول بدو ٍ فالهداد
هايج في مقدم الوسم قدام الربيـــع= ما يردونه عن كبارها الا بالقــياد
كب عنك اللي يبنشر بها سوق النقيـع= ددسن ٍ لا شاف سواقها التغريز حاد
زينها تروي لفرق ٍ يباري له قطيــع= في غمارتها مناديل شيبان الجهـاد
ويقول ايضا\" في قصيده جميله مرحه :


حن قلبي حن مور ٍ عليه الماء الهماج =حموله إمن ( الطويله ) وسواقه غشيم
الدبش فالقوز والخط دافنه العــجاج= مع عداوي وادي كلها رمث وهشيــم
او كما لجلاج خلج ٍ تلجلج بالــخلاج = العرب شدّو وشيخ العرب عيـّا يقيـم
او كما لجلاج ناس ٍ تهاوش في الحراج= وسط سوق ٍ بين دخنه وحايل والقصيم
والسبب من صاحب عجلوبه للـزواج= قبل اجيهم جعلهم بالعذاب المستقــيم
صاحبي ما يرضع الجفر وعيال النعاج= مع فريق ٍ ربعوا به ومجلاسه حشيـم
صاحبي ما يشرب الببس ومرقة الدجاج= يغتبق له من لبن خلفة ٍ ترزم رزيـم
ما قعد وسط النخل مع ملقطة الخماج= يتبع الذيدان بين البشيره والنضيــم

جمع وإعداد
الشريف مناحي بن ذعار بن لؤي العبدلي

بواسطة : hashim
 4  0  13468
التعليقات ( 4 )

الترتيب بـ
الأحدث
الأقدم
الملائم
  • #1
    23-02-30 02:49 مساءً خالد بن محمد المطيري :
    مشكوووور ماقصرت ياابن لؤي على الموضوع الاكثر من رائــــع وصح لسان

    قايلها ورحمه الله

    مشكــــور يابن مناحي العبدلي على قصايد غالب عساه بالجنه
  • #2
    14-11-32 10:16 مساءً الشريف عبدالرحمن الجازاني :
    صح لسانكـ يابن عمي ,,, واشكرك على القصديه الرائعه
  • #3
    14-11-32 10:18 مساءً الشريف عبدالرحمن الجازاني :
    الله يرحمه ويجعله بجنات النعيم يارب وشكراَ يامناحي
  • #4
    27-11-32 07:20 مساءً الشريف مناحي بن لؤي :
    اشكرك اخ خالد المطيري على مرورك العطر وتقبل احترامي

    كما اشكر ابن العم الفاضل الشريف عبد الرحمن الجيزاني


    وفق الله الجميع وتقبلو فائق تقديري واحترامي

    محبكم الشريف مناحي بن لؤي العبدلي
-->